NGENING ALDONG ini, pasinayan tayang umpisan ing ika-adwang pulut siyam anibersaryu ning Sinukwan Festival—metung a makabaldugan pamagsadya para king ikatlung pulung banwang anibersaryu na keng daratang a 2027.
Ing tema tamu ngening banwa, “Tetagan Lub at Sipagan, king Kultura Miambagan,” magpaganaka kekatamu na ing katatagan lub at likas tamung kasipagan ing magpasigla at magpalagu king kekatumung kulturang Kapampangan.
Pero bayu taya pisabyan ing programa ning festival at pasiknangan ing kekatamung pamisanmetung para king Sinukwan Festival 2026, buri ku sanang dinan halaga ing sangkan nung bakit tamu gagawan ining pamagmasusing ayni.
Ing pusu ning Sinukwan Festival, metung yang malino a misyun: ing pamanyulung ning kulturang Kapampangan— manibat king kekatamung obra maestra, king kekatamung pamangan, anggang king deng ugali a mig-ubog kekatamu bilang metung a lahi.
Ali mu ini pamanyulung ning kultura, gagawan tamu ini bang deng anak at kayanakan ning Pampanga, atin lang giya para tukyan bukas, na atin lang pagmaragul at ilang mismo ing maging talaturo kareng daratang a henerasyon.
Balang terak a ituru tamu, balang recipe a lulutu at pagmaragul, metung yang pamana a papasa tamu keng gamat da ring kekatamung kayanakan. Buri tamung abalu da at paulagan da ing lugud ampong dangalan ing kulturang Kapampangan — ali mu bilang metung a istoryang kukuwentu tamu karela nune metung a kulturang dapat dang gamitan keng aldo-aldong pamibye-bye at ituru da naman kareng anak da keng daratang a panahun.
Anyapin pu manibat keng a-beinti uno ning Nobyembre angga keng a-beinti otso, iya pu talaga ing festival proper idalan taya ing misyun ayni kareng kekatamung kayabe malls at venues.
Mag-umpisa ya ing festival 2026 king masaya at maragul a programa at ribbon-cutting da ring festival booths, itaglus taya king drum and lyre competition.
Deng kekatamung entabladu, maging masigla la at kumabye king Sinukwan Street Dance competition at Sinukwan Interpretative Dance competition, nung nukarin deng kekatamung gaganap ipakit da ing kasalesayan at tradisyun Kapampangan kapamilatan na ning indak at terak.
Koronahan taya ing Lakan at Lakambini ning Sinukwan, deng kekatamung ambassadors of beauty, culture at advocacy. Kasabe na nini, ing Santungan ning Kulturang Kapampangan maglatag yang miyayaliwang heritage-building activities — kayabe ya ing Patenakan Quiz Bee, Kurang-Kurangan, Spoken Word Competition, ampong Dance Workshops — makadisenyu para mas midagdagan ing pamanintindi at pamag paulaga da ring kekatamung kayanakan nung ninu talaga ikatamu bilang lahing Kapampangan.
Ing partnership signing ceremony tamu ngeni, ing pundasyun para maging dalan para ing egana ganang kaganapan na ning festival malyari.
Ing Foundation for Lingap Kapampangan kambe naning Sinukwan Festival 2026 Executive Committee ampo deng kekatamung official festival partners, ali tamu mu pipirma king metung a dokumento — nune mibubuklat at gagawa tamung metung a pamangako o shared commitment: aliya taya papalyaryang mawala ing kulturang Kapampangan, na aliya makalingwan ing kekatamung minananng dangalan, at ing susunud a henerasyun Kapampangan, dagul lang balu da talaga nukarin la menibatan.
Kekayu pung kaluguran king media — salamat pu king saup yu para ing istorya tamu mapabalu ya at miras ya kareng balang Kapampangan, nukarin la man suluk ning yatu.
Kareng kekatamung kayabe at sponsors, dakal a dakal salamat king pamaniwala yu at saup king pamanyulung ning kekatamung kulturang Kapampangan para king kabyasnan da reng kekatamung kayanakan.
Isulung tamu pu at sesen at palagwan ing makapagpasaya at makapagmaragul a kulturang Kapampangan.
Luid ya eng Pampanga. Masayang Sinukwan Festival 2026 kekatamu ngan.
(From Ms. Romero’s message at the media launch of Sinukwan Festival 2026, at the Santungan ning Kulturang Kapampangan, City of San Fernando, 29 Sewpt. 2026)
