PATAY nang nalandig sa tambalanan ang usa ka lalaki human nibalitok ang iyang gimaneho nga motorsiklo dihang iyang gilihayan ang kanding nga nilabang sa karsada sa Barangay Maya, Lungsod sa Daanbantayan, Sugbo, sa alas 2:30 sa hapon sa Huwebes, Marso 6, 2025.
Ang biktima giila nga si Ramon Abellana Briones , 43 anyos, minyo nga taga Sityo Kanlay sa maong barangay.
Sa iyang paningkamot nga dili maigo ang kanding, siya na hinuon ang nadisgrasya.
Ang maong hitabo gipahibalo sa Daanbantayan Municipal Police Station sa alas 5 na sa hapon sa maong adlaw.
Sa follow-up interview sa Superbalita Cebu ngadto ni Chief Master Sergeant Alfredo Ygot Mandal sa Daanbantayan Municipal Police Station nga maoy nag-imbestigar sa kaso, nahibaw-an nga ang biktima padulong na mga mopauli gikan sa Lungsod sa Medellin.
Matod ni Mandal nga base sa gipangsaysay sa mga saksi nga kusog ang dagan sa biktima dihang nikalit og labang ang kanding pag-abot sa maong dapit ug nakumot ang hand brake.
Nabalitok ang motor ug nabunal sa semento ang ulo sa biktima.
Ang biktima nakabaton og grabeng kadaut sa iyang ulo ug kalawasan bisan pa kon nagsul-ob siya og helmet. / DVG
