Gipriso ang usa ka 28 anyos nga lalaki human gipasanginlan nga “nanion sa iyang buhi” ug nanghikap sa usa ka dalagita alas 8:00 sa buntag, Martes, Enero 21, 2025 sa Sitio Upper San Roque, Barangay Bulacao, Dakbayan sa Sugbo.
Si alyas Jun Mark, glass installer nga nagpuyo sa nahisgutang lugar, gidakop sa amahan sa biktima alas 5:30 sa hapon sa Martes ug gi-turn-over ngadto sa Inayawan Police Station.
Si Jun Mark nanghimakak nga nagbinastos siya sa biktima.
Ang biktima nga si Mae, 13, nipasangil nga gikumot ug gihikap sa suspek ang iyang pus-on ug gipakita ang kinatawo niini.
Si Jun Mark nga nahinabi sa Superbalita Cebu niangkon nga hubog siya niadtong higayuna apan siya nangatarungan nga wa siya magbinastos.
Naabot sa balay sa biktima ang suspek kay giimbitar kini og tagay sa amahan kay bag-ong naabot gikan sa Manila.
Nagbuntag sila og inom ug nag-videoke nga naabtan sila og alas 8:00 na sa buntag.
“Imposible kaayo nga akong kumoton o hikapon naa man iyang papa,” dugang sa suspek.
Gipanghimakak sab sa suspek nga gipakita o gitiunan niya sa iyang kinatawo ngadto sa biktitma.
Iyang katarungan nga nangihi siya niadtong higayuna ug tungod sa iyang kahubog wa matuyo nga nakit-an kini sa biktima.
Ang biktima nibutyag nga tungod sa gibuhat sa suspek ,iya kining gitukmod apan wa masayod niini ang iyang amahan kay nakatulog man gumikan sa kahubog.
Matod sa biktima nga nipasidaan pa kaniya ang suspek nga di magsaba.
Pagkahapon gipangita sa amahan sa bata ang suspek ug gidakop ug nabalhug sa police station sa Inayawan.
Mag-atubang og kasong act’s of lasciviousness in relation to RA7610 ang suspek. / GPL
