Mo-host ang Dakbayan sa Naga sa 2025 Cebu Provincial Sports and Cultural Festival (CPSCF) nga sa unang plano ipahigayon sa Lungsod sa Asturias.
Kining maong kasayuran gibutyag sa Asturias Public Information Office (PIO) niadtong Enero 3, 2025, ug gikompirmar sa Capitol PIO pagka Enero 7.
Sa Facebook post sa Asturias PIO niadtong Biyernes,Enero 17, si Schools Division Superintendent, Senen Paulin, nakigtagbo ni Asturias Mayor Donaldo “Dongkoy” Camacho aron pormal nga pahibaw-on nga nausab na ang venue sa festival.
Si Camacho wa mosupak ug nipadayag og padayong suporta aron maseguro ang kalampusan sa event bisan sa pagkabalhin sa venue.
Ang kausaban maoy kabahin sa lapad nga plano ni Gobernador Gwendolyn Garcia nga usahon ang sports ug cultural events sa mga Siyudad ug kalungsoran sa Sugbo.
Gipasabot ni Garcia nga ang maong lakang maoy mopalambo sa pagtambayayong ug kahiusahan sa mga local government sa Sugbo ug sa ilang mga eskuylahan.
Kini maoy ikaduhang sunodsunod nga tuig nga ang Dakbayan sa Naga maoy mag host sa Cebu Provincial Meet, human sa malampuson nga post-pande-mic event niadtong 2024.
Gitakda kining himuon sa Pebrero 2–7, 2025, nga ang festival dunay 24 ka sports categories ug cultural competitions, nga salmotan sa mga elementary ug high school student-athletes nga mag representar sa 44 ka mga munisipyo.
Isip kabahin sa One Cebu Province initiative sa Kapitolyo, mga component city school division mosalmot sab sa Cebu Provincial Meet aron palig-unon ang kahiusahan sa educational sectors.
Kining maong division maglakip sa Mandaue, Talisay, Toledo, Bogo, Carcar, ug Naga.
Sa sayong pahibawo sa PIO sa Asturias, ilang gipadayag ang pagkahinamhinam ug kaandam sa ilang lungsod aron maoy mo-host sa Provincial Meet.
Apan ang desisyon sa Gobernador pagbalhin sa venue nasubay sa iyang tinguha nga mas sayon ang accessibility ug logistical support kon anha kini sa Naga himuon.
Si Camacho nipasalig nga magpadayon ang suporta sa ilang Lungsod sa mga kalihukan sa Kapitolyo kay paningkamot man kini sa Probinsya.
Samtang giklaro ni Garcia nga ang pagka apil sa mga city division sa provincial initiatives nagpakita sa lahi nga approach sa Probinsya ngadto sa education governance.
Kining maong panagtambayayong nagseguro sa access sa mga programa sama sa Sugbo School Feeding Program ug pagpang apud-apod sa mga school supplies nga nagtumong sa pagpalambo sa kahibawo sa mga tinun-an sa Probinsya sa Sugbo.
Kay nasuwayan na sa ilang kahanas, ang Dakbayan sa Naga City gipaabot nga makahatag og hapsay ug competitive environment alang sa Provincial Meet nga maghatag og dan sa mga nga mo-excel sa umaabot nga Central Visayas Regional Athletic Association (CVIRAA) games. / CDF
