GIINSISTER sa Police Regional Office-Davao Region (PRO-Davao) nga ang anti-illegal drug campaign sa Philippine National Police (PNP) nagpabilin nga naglihok sa tibuok nasud.
Sa eksklusibo nga paghinabi uban sa SunStar Davao niadtong Nobyembre 27, 2024, gihimakak ni PRO-Davao spokesperson Major Catherine Dela Rey ang mga pag-angkon nga ang kampanya giarangkar na, nga nagtumbok sa gialegar sa “legal document” nga gipaambit sa ilang buhatan ngadto sa mga tigbalita.
“Dili ni to siya tinuod. Wala pud mi nadawat nga mando from the Camp Crame. Padayon ug mas gipakusgan namo ang amoang program against illegal drugs and other illegal-drug-related activities,” pagtataw ni Dela Rey nga dugang nagkanayon nga ang PNP padayon sa ilang paningkamot sa pagpromotar ug paglimpyo sa “drug trafficking and smuggling” sa matag rehiyon sa nasud.
Matud niya nga ang PRO-Davao wala masayud sa pag-angkon nga terminasyon sa programa, ug subling nagsulti nga way ingon niini nga memorandum ang gipagawas.
“Wala mi kabalo sa existence ani. If naa man, willing mi makig-cooperate pero as far as our agency is concerned, dili ni mahitabo. Padayon atoang cooperation pud sa ubang government agency regarding the said campaign,” pagklaro ni Dela Rey.
Ang gialegar nga dokumento nag-angkon nga ang City ug Municipal Police Stations (C/MPS) gidid-an sa paglusad og anti-illegal drug operations sulod sa ilang areas of responsibility. Inay, gisuhestiyon nga ang ilang papel mao ang pagtutok sa pagbantay sa mga komunidad, pagpromotar sa tawhanong katungod, ug gathering intelligence sa pagtubag sa distribusyon sa druga ug proteksiyon sa gamhanang mga indibiduwal.
Samtang gihingpit na sa PNP ang ilang Anti-Illegal Drug Campaign Roadmap 2024-2028, nga nagtumong sa pagpahugot sa paningkamot batok sa ilegal nga druga uban ang “rights-based and humane” nga paagi.
Gipahimug-atan ni PNP Chief General Rommel Francisco Marbil nga ang roadmap nga gimugna sa “hard-earned lessons from the past” ug nagpasidungog sa mga sakripisyo sa mga pulis.
“This roadmap is a testament to our dedication to protecting lives and upholding human dignity. It honors the heroism of our police force and aims to foster a safer, drug-free Philippines,” tin-aw ni Marbil.
Ang estratihiya naghatag og prayoridad sa “rights-based operations, international collaboration, specialized training, and community engagement”. Nag-aninaw sab kini sa pag-integrate sa law enforcement system aron palambuon ang “public trust and streamline national and local cooperation.”
Ang PNP Drug Enforcement Group, pangulohan ni Brigadier General Eleazar Matta, nagdebelop og plano uban ang “input” gikan sa angay nga PNP directorates. (David Ezra Francisquete)
